PROXECTO
DE FOMENTO DO USO
DO GALEGO IES
ILLA DE SAN SIMÓN
CURSO 2015-2016
1. ESTUDO SOCIOLINGÜÍSTICO.
1.1. Contorna sociolingüística do centro.
O IES
Illa de San Simón está situado nunha vila, a vila de Redondela, e isto leva
consigo o arrastre de todos os prexuízos cara o galego que hai nas contornas
urbanas. A meirande parte do seu alumnado procede dun sector de clase media,
obreiros e profesionais. A lingua do seu ámbito máis próximo é maioritariamente
o castelán , os pais, en moitos casos galegofalantes, adoitan empregar o
castelán na comunicación cos seus fillos. Malia coñeceren na súa maior parte o
galego, o seu uso queda restrinxido a ocasións moi determinadas. A comodidade e
a situación diglósica na que se achan produce unha infravaloración da propia
lingua e determina que a instalación no castelán sexa a máis estendida.
Partimos
da idea de que a lingua é un piar fundamental na identidade dos pobos é por iso
que é mester recoñecer a importancia da súa aprendizaxe e uso, potenciándoa e
impulsándoa de xeito que acade todos os ámbitos de uso na sociedade.
A
superación da diglosia e a atenuación das súas consecuencias, que non son
outras que a desgaleguización, deben ser os obxectivos principais do Proxecto
de Normalización Lingüística.
Son, sen dúbida, os centros de ensino o
punto de referencia focal na aprendizaxe da lingua dado que os pais, nisto como
en moitas cousas, delegan no noso labor de mestres. Así que debemos promover a
súa adquisición mediante o desenvolvemento de hábitos lingüísticos que perduren
ao longo da súa vida e non só na etapa escolar.
Así, será tarefa deste equipo:
·
Fomentar o uso do galego en todos os niveis e situacións
comunicativas.
·
Apoio ao profesorado que se implique no desenvolvemento do
seu labor educativo en galego.
·
Colaborar co resto de sectores da comunidade educativa para a
consecución da normalización.
·
Recuperar os falantes que abandonaron a lingua e facer por
outros novos.
·
Superar a diglosia e atenuar os motivos que levan á
desgaleguización.
1.2. A situación do profesorado
A situación actual case non cambiou
en relación a anos anteriores, e así alterna o monolingüismo en castelán ou
galego co bilingüismo ou diglosia.
Nas reunións de Claustro a lingua
habitual é o galego, se ben temos que sinalar que algúns claustrais só usan
esta lingua nesa situación formal. Un reducido número de membros do claustro
utiliza o castelán, aínda que constatamos que ese número vai, ano a ano, en
aumento.
En
canto ás relacións entre o profesorado, a situación é semellante á exposta no
apartado anterior. Agás un pequeno grupo de monolingües en galego ou en
castelán, o resto emprega unha lingua ou outra dependendo do interlocutor e da
lingua que este use habitualmente.
Nas
reunións do Consello Escolar a lingua utilizada polo profesorado é o galego,
porén o alumnado e os pais/nais optan, en certos casos, polo castelán.
1.3. A situación do alumnado
A
lingua máis usual entre o alumnado é o castelán, o seu uso supera a porcentaxe
do noventa por cento. O proceso de castelanización masiva das xeracións máis
novas compróbase aquí claramente. Pouco
importa que eses mesmos alumnos e alumnas recoñezan, maioritariamente, que
tanto os seus pais como os seus avós son galegofalantes. O uso diglósico nas
relacións públicas -e a vida no instituto inclúese claramente no ámbito
público- exclúe o galego como lingua de relación entre os alumnos e alumnas.
Apenas cambia a situación cando o alumnado se relaciona co profesorado, aínda
que este sexa galegofalante.
O alumnado é, pois,
maioritariamente castelán falante. Mesmo nas materias en que a lingua vehicular
é o galego, hai que lles pedir e lembrar que a teñen que empregar.
Algúns recoñecen que no seu
ámbito familiar falan en galego, pero que no centro non o fan pola presión
social que exerce o castelán, presente como lingua habitual no resto do
alumnado.
Só de maneira case
“anecdótica”, de cando en vez, existe algún caso de galego falantes monolingües
en galego.
Isto constata unha vez máis
o proceso desgaleguizador que se produce na escola.
A súa valoración da lingua é positiva, pero non a
empregan. Os datos son alarmantes.
Este proceso de perda de falantes queda ben á vista
após consultar a sondaxe que se xunta con este documento.
1.4. A situación lingüística do centro.
O IES Illa de San Simón de Redondela é un centro público situado na
bisbarra dunha zona urbana, a área metropolitana de Vigo. Conta con 247 alumnos
repartidos en 13 grupos impartidos por 30 profesores.
A
actividade docente axústase ao novo decreto de plurilingüismo 79/2010 de 20 de
maio.
As actitudes respecto á
lingua dependen unha vez máis de cada profesor a título individual. Entre os
que non usan o galego nas súas aulas, a comodidade, falta de material en galego
(libros de texto, terminoloxía, dicionarios, material de apoio, etc.) son os
motivos alegados por moitos profesores bilingües que non se decantan polo uso
da nosa lingua.
A todo isto hai que
engadir as modificacións legais que provocan o cambio de lingua en moitas
materias coa aplicación do novo decreto de plurilingüismo.
A rotulación do centro é case toda en
galego. Os anuncios e avisos que se expoñen ao público por parte da dirección
están redactados en galego, non acontece o mesmo cando estes anuncios e avisos
son do alumnado e/ou da ANPA.
2- EQUIPO DE DINAMIZACIÓN LINGÜÍSTICA
Neste Centro, segundo a orde do 24 de xullo de
1.991(D.O.G. do 28 de agosto) constitúese o primeiro equipo de normalización
lingüística e deseñouse un proxecto de normalización , aprobados ambos polo
Consello Escolar. Este equipo inicial foi mudando ao longo do tempo, no caso do
alumnado, por iren finalizando os seus estudos; no caso do profesorado , o
cambio débese á intención de facer partícipes deste proxecto ao maior número
posible de profesores.
O
actual decreto 79/2010 propón a formación dun equipo de dinamización
lingüística nos centros de ensino, e seguindo o anterior decreto 124/2007
o EDL neste curso está formado por:
Ø
Profesorado: Elvira López Alló,
Mónica González Miguéns, Rosa María Sánchez Rivas.
Ø
Persoal non docente: Sabela Vigil
Touza.
Ø
Alumnado: Andrea Castro Cameselle,
Andrea Domínguez Magariños, Marcos Eugenio Ferreira.
Ø
Coordinador: Xosé Luís Clemente
Ledo.
3- OBXECTIVOS.
O obxectivo primordial deste
proxecto é o de acadar que a lingua galega sexa usada por todos os membros da
comunidade educativa en todos os ámbitos de comunicación, fornecendo os
instrumentos e potenciando as actitudes que faciliten o uso da nosa lingua
tanto de xeito oral como escrito. Para levalo a cabo establécense os seguintes
obxectivos específicos, pero queremos facer notar que todos eles están
interrelacionados, por iso forman parte dun plan.
1. Fomentar o respecto á realidade plurilingüe e
pluricultural do Estado español, de Europa e do mundo actual.
2. Descubrir e eliminar os prexuízos lingüísticos en
todos os campos promovendo a sensibilización idiomática, analizando de forma
crítica os prexuízos actuais.
3. Sensibilizar a comunidade educativa sobre os
principais aspectos da normalización lingüística: desigualdade ante a lei,
condutas discriminatorias, falta de apoio económico,… Para lograr isto cómpre
contribuír ao cambio de actitudes do profesorado axudando a corrixir prexuízos
e actitudes acomodaticias e negativas relacionadas coa lingua galega. Un
aspecto esencial para a consecución de tales obxectivos é contribuír á
formación do profesorado fornecendo a bibliografía, o material didáctico
imprescindible para o desenvolvemento do
seu labor.
4. conseguir un cambio de actitude do alumnado fronte
á lingua. A súa implicación nas actividades programadas por este EDL debe
axudar a que tomen conciencia de que a realidade lingüística galega non implica
a escolla entre unha lingua ou outra, senón o coñecemento adecuado das dúas
linguas oficiais. É necesario facerlles ver que o emprego correcto, tanto oral
como escrito, das dúas linguas o que fai é abrirlles posibilidades laborais,
comunicativas e culturais que doutro xeito non acadarían. Ademais trátase de
evitar as interferencias lingüísticas que o descoñecemento ou falta de nivel
nunha das lingua implica.
5. Implicación das familias no proceso normalizador.
Na corrección das actitudes negativas cara á lingua é fundamental que se
impliquen tamén os pais. A colaboración dos pais, en primeiro lugar a través da
ANPA do centro, vai ser un dos principais obxectivos deste EDL. Trátase de que
o alumnado tome conciencia de que na súa familia, pais e sobre todo avós, hai
un coñecemento oral e, ás veces, tamén escrito amplo da lingua galega. Coñecen
o galego e úsano como usan o castelán, esta é a realidade lingüística normal de
Galicia e, polo tanto, trátase de que eles mesmos se integren nesa realidade:
usan o castelán e deben tamén usar normalmente o galego.
En resumo: fomentar que na casa, no ámbito familiar se
potencie o uso da nosa lingua como medio para acadar a plena normalización e
conseguir competencia total no uso oral.
6. Este EDL debe conseguir a colaboración dos
distintos departamentos didácticos do centro nas actividades de dinamización do
galego porque iso vai redundar na creación de oportunidades para que o
profesorado empregue a lingua galega e
tamén nunha máis fluída comunicación entre alumnado e profesorado.
7. Fomentar a colaboración co Concello de Redondela,
con outros centros de ensino, asociacións culturais, deportivas,... para
organizar e participar en actividades conxuntas.
8. Facer visibles elementos caracterizadores da
cultura galega, pondo de relevo as nosas tradicións: maios, entroido, festa da
Coca,...
9. Dar a coñecer á sociedade en xeral e concretamente
a toda a comunidade educativa o Plan de dinamización lingüística.
4- ACTIVIDADES.
Dado que o profesorado é decisivo
na creación dun ambiente normalizador, é obxectivo deste equipo dispensar todo
o asesoramento puntual que precise e facerlle ver a importancia do seu papel no
proceso que leve a normalizar a lingua.
Tamén se levarán a cabo
actividades que melloren as competencias e actitudes lingüísticas da comunidade
escolar e fomenten o uso do galego.
1.- Revista.
Todos os cursos se edita
a revista “A fiestra do Illa”, imos polo número 16. A revista constitúe o eixo
arredor do cal xiran múltiples actividades nas que se implican a maior parte
dos departamentos. Destacamos o concurso de portadas que organiza o
Departamento de plástica e os debates que se organizan nas aulas arredor de
temas como o cambio climático, o fracaso escolar, as novas tecnoloxías, etc.
Póñense por escrita as conclusións e con posterioridade selecciónanse os máis
destacados e publícanse na revista. Tamén se publican os poemas, narracións e
artigos premiados nas Letras Galegas.
2.- Concursos.
- Concurso de relato curto en
colaboración coa ANPA do centro ( xa levamos catorce anos organizándoo con moi
boa acollida). Os premios entréganse nas Semana das Letras Galegas. Como xurado
actúa persoal non docente, membros da ANPA , alumnado e profesorado.
- Concurso “A camisola da lingua”, consiste no deseño
dun lema con debuxo referido á lingua
galega e a súa normalización para estampar en camisolas. Como
xurado actúa persoal non docente, membros da ANPA , alumnado e profesorado.
- Concurso de portadas, organizado polo Departamento
de plástica, para a revista. A gañadora vai na portada e a segunda na
contraportada.
- APADRIÑA UNHA PALABRA
Esta
actividade está dirixida a todo o alumnado. O obxectivo é o rescate do noso
léxico. A actividade consiste en que cada alumno/a propoña unha palabra para
ser recuperada. A visualización das palabras faríase mediante carteis: as
palabras poñeranse en cartolinas nas clases e despois polo centro. Cada clase
elixe, de entre todas as presentadas, unha que a represente. Finalmente, faise a escolla, mediante votación, da que se
considere máis representativa. as finalistas serían 14 e as gañadoras tres.
Sobre
estas palabras recae o compromiso de seren usadas e amosadas en público.
3.- Saídas pedagóxicas,
asistencia a exposicións, concertos, presentacións de libros e visitas guiadas.
- Realizaremos
conferencias, coloquios, charlas, etc... Contactando con escritores/as e
personalidades salientables da sociedade galega.
- Realización da “Rota
Rosaliana” por alumnado de terceiro ESO.
- Percorrido “A esmorga”
por Ourense para o alumnado de cuarto ESO.
- Participación de
grupos de alumnos/as en horario non lectivo en actos culturais que se organicen no Concello de Redondela.
Especialmente, asistencia a presentación de libros, concertos, exposicións de
pintura, teatro, festival de marionetas, proxeccións de películas ou curtas.
Todas estas actividades son preparadas nas aulas con traballos ou debates que
acheguen o alumnado aos autores e obras que van ver.
- Colaboración coa
Concellaría de cultura do Concello de Redondela: visitas guiadas á Illa de San
Simón, exposicións culturais,...
4.- Club de lectura e biblioteca.
O club de lectura do IES
Illa de San Simón chámase “A Illa dos libros”. Dispoñemos de dous clubs de
lectura, un para primeiro ciclo baixo o nome de “Os choquiños” e outro para
terceiro e cuarto co nome de “Os Chocos”. As propostas de libros van sempre
acompañadas dunha breve explicación do por que da elección do libro, pautas de
lectura e suxestións que convidan ao goce coa lectura. Posteriormente realízase
unha sesión de posta en común sobre diferentes aspectos destacables da obra.
Tamén se realizan proxeccións e visitas de espazos relacionados coas lecturas:
Rota Rosaliana, Pazo de Trasalba, Rota A esmorga, praia e Illa de San Simón,…
Tamén se colabora coa
biblioteca “O mar das palabras”.
5.- Música galega.
O Departamento de música
e o EDL colaboran nunha exposición de instrumentos de tradición galega: gaita,
zanfona, percusión, traxe típico,… Nesta colaboración tamén entra o
Departamento de lingua galega xa que se escolman cantigas, comezando polas de
Santa María e continuando polas populares, que logo son recitadas coa axuda de
instrumentos.
6.- Campaña de promoción do
galego entre os comerciantes da vila de Redondela.
Os Departamentos de
lingua galega e literatura e de plástica colaboran co EDL formando grupos de
alumnos de diferentes niveis que voluntariamente participan na promoción do
galego entre os comerciantes da vila. A campaña oriéntase basicamente á
elaboración de carteis e letreiros anunciadores de produtos e prezos. O
alumnado debe dirixirse primeiro aos comerciantes para presentarlles a campaña
e pedir a súa colaboración, amósanlles varios tipos de letreiros plastificados
e, no caso de aceptaren, faise a listaxe de produtos que o comercio desexa
anunciar ou promover. Esta actividade realízase en parte en horario non
lectivo, implicando tamén a familia do alumno/a.
7.- Colaboración coas
asociacións de veciños e círculos recreativos.
O Departamento de lingua
galega e literatura axuda a organizar grupos que se dirixen ás asociacións de
veciños para colaborar nas súas actividades para que estas se realicen en
galego, axudando á redacción e corrección de avisos, cartas e carteis
anunciadores e ofrecendo a posibilidade de colaborar nas súas páxinas web.
Nestas asociacións e
centros recreativos tamén se trata de atraer a persoas maiores que queiran participar nas actividades do
centro, por exemplo no Club de lectura ou, como se fixo o curso pasado,
reunións nas clases con avós para que nos fixeran partícipes da súa experiencia
laboral ou social.
8.- Conferencias informativas
e debates acerca da normalización.
O alumnado, membros da
ANPA e resto de pais son convocados para ver exposicións sobre persoeiros das
Letras galegas ou a relatorios sobre a historia e normalización do galego. O
alumnado de cuarto dálle a coñecer a pais e resto de compañeiros os problemas
normalizadores e como poden colaborar activamente na súa resolución, poñendo de
manifesto os comportamentos diglósicos.
Estas reunións con avós,
pais e resto da comunidade levan o nome de “Nós falamos galego, e ti por que
non?”
9.- Programa de adaptación
lingüística.
Sabemos dos problemas
lingüísticos dalgúns membros do profesorado e do alumnado (sobre todo os que
chegan por primeira vez Galicia) para desenvolverse con comodidade e fluidez en
galego. Desde o EDL propoñemos a realización de charlas informais nas que se
intenta que vaian adquirindo a fluidez necesaria e así non renuncien a
expresarse en galego. Nestes encontros resolveranse dúbidas e faranse as
correccións oportunas. Este programa leva o nome de “Axuda lingüística”
10.- Adquisición de fondos.
- Seguiremos mercando
xornais e revistas de información xeral para pór á disposición da comunidade
educativa. Estamos subscritos a Grial.
- Biblioteca:
1.
Adquisición de material audiovisual en galego para servizo de préstamo (alumnado
e /ou profesorado).
2.
Material bibliográfico: libros de lectura, consulta, banda deseñada,...
3.
Elaboración dun marca páxinas cun lema que potencie a lectura en galego.
14.- A nosa cultura.
- Celebracións no IES
coas que colabora o EDL ( documentación gráfica, material para a revista,
concursos,...).
1.
Magosto e xogos populares.
2.
Entroido: concurso de coplas en galego.
3.Celebración
dos “maios”: elaboración de coplas.
4.
Semana dedicada ás Letras Galegas: traballos, carteis, actos,...
5.
Festa “Fin de curso”: despedida do alumnado de 4º da ESO.
15.- Colaboración con outras
entidades.
- Colaboración co Servizo de Normalización do
Concello de Redondela: proxeccións audiovisuais, actividades teatrais, blog,...
16.- As TIC normalizan.
- Empregar
as TIC para dinamizar o uso da nosa
lingua.
Nestes momentos contamos
xa cunha páxina web do centro na que participa de forma activa o profesorado e
o alumnado: http://www.edu.xunta.es/centros/iessansimon/ e con varios blogs.
CADRO RESUMO DE ACTIVIDADES
O orzamento das actividades programadas irá a cargo das axudas aos
proxectos dos EDL da Secretaría Xeral de Política Lingüística e das partidas
contempladas nos orzamentos do propio Instituto. Outras actividades patrocínaas
o Concello de Redondela.
Dependemos en grande
medida das propostas que vaiamos recibindo e que poidamos asumir ao longo do
curso.
Así pois, relacionamos
só as actividades fixas que se realizan todos os anos e a petición de axudas e
material para o seu desenvolvemento.
Destas actividades son plurianuais as seguintes:
-
Club de lectura: farase que, sobre todo, o alumnado
participante siga asistindo a este club durante toda a súa estadía no centro.
Para iso está establecido o plan de lectura de varios cursos. Pódese consultar
na web.
-
Concurso literario: faise un seguimento de todos os
participantes durante a súa vida escolar.
-
Revista: está formado un consello de redacción no que os
membros permanecen varios cursos.
As seguintes actividades fanse en colaboración con
outros entes:
-
Saídas pedagóxicas: en colaboración co Concello e a
Coordinadora de equipos de normalización do mesmo , asociación de empresarios
de Redondela e industrias da zona. Consiste na visita a algunha empresa da
bisbarra para darlle a coñecer ao alumnado as características do noso tecido
industrial e facer, por parte do alumnado, unha análise do uso do galego na
mesma. Tamén se analiza a rotulación das distintas empresas da zona e estúdase
o seu grao de implicación na defensa da lingua. Repártese entre elas a nosa
revista para que coñezan as iniciativas levadas a cabo.
-
Roteiro pola vila: en colaboración co Concello e a
Coordinadora. Son “paseos” pola vila para dar a coñecer o pasado, presente e
futuro da etnografía, arquitectura e arte do núcleo urbano.
-
Coñece a Illa: en colaboración co Concello e a Coordinadora.
Consiste en visitar a Illa de San Simón para coñecer a súa historia e edificios
representativos.
No referente á implicación doutros sectores da
comunidade educativa no noso proxecto sinalamos:
-
No décimo cuarto concurso de conto participa o alumnado, pero
a ANPA está representada no xurado elixindo as mellores obras e dando a súa
opinión sobre as melloras que se poden introducir. Tamén participa no xurado
todos os membros do equipo de dinamización polo tanto hai profesorado, alumnado
e persoal non docente.
-
Na revista A fiestra
do Illa damos espazo para as colaboración de departamentos,
profesorado, equipo directivo, alumnado, persoal non docente, ANPA e pais/nais
en xeral.
No fomento da oralidade implicámonos nas actividades:
-
Dramatización e recitado de textos.
-
Usando a lingua galega nas relacións de alumnado- profesorado-pais no centro, e
sobre todo nas actividades de xogos, festas populares e no intercambio. O
exemplo que destacamos é o do grupo de alumnos que “cantan” maios no concurso
do Concello
O uso das novas tecnoloxías céntrase na actualización
da páxina web, na aula virtual (co uso de Moodle) e nos diferentes blogs de
profesorado e alumnado (exemplo o blog matinandonalingua, oedldoilla,
clubdelecturadoilladesansimon, etc).
Tamén se fai uso delas na edición da revista e na
participación no concurso de conto, nas bases sinálase a obriga de entregar os
traballos en formato dixital.
Temporización
|
Actividade
|
Responsable
|
Destinatario
|
Orzamento
|
Todo o curso
|
Axuda lingüística
|
EDL
|
Com. educativa
|
0 €
|
Todo o curso
|
A fiestra do Illa
|
Varios dep.
|
Com. educativa
|
600 €
|
Primeiro trimestre
|
Apadriña unha palabra
|
Varios dep.
|
Alumnado
|
0 €
|
Maio
|
Relato curto
|
EDL
|
Com. educativa
|
100 €
|
Xuño
|
A camisola da lingua
|
EDL/Plástica
|
Alumnado
|
100 €
|
Terceiro trim.
|
Rota A esmorga
|
Varios dep.
|
Alumnado
|
340 €
|
Todo o curso
|
Música galega
|
EDL/Música
|
Alumnado
|
340 €
|
Todo o curso
|
Club de lectura
|
Varios dep.
|
Alumnado
|
0 €
|
Todo o curso
|
Comercio da vila
|
Varios dep.
|
Alumnado
|
60 €
|
Terceiro trim.
|
Nós falamos, e ti por que non?
|
Varios dep.
|
Comunidade educ.
|
0 €
|
Todo o curso
|
Festas populares
|
Varios dep.
|
Alumnado
|
0 €
|
Terceiro trim.
|
Coñece a Illa
|
EDL/Concello
|
Alumnado
|
0 €
|
Este é o proxecto de fomento do uso do galego do IES
Illa de San Simón para o curso 2015-2016.
Asdo. O coordinador. Vto. e prace do director
Xosé
Luís Clemente Ledo Ramiro
Armesto
Redondela, 30 de
setembro de 2015
Ningún comentario:
Publicar un comentario